Arao

2012-01-22T17:58:00.002+01:00

AS NOITES NA BIBLIO Así debe ser como pasan as noites os libros na biblio, cando quedan tranquilos, e un pouco aburridos, esperando a que chegue un novo día e con el os lectores que os fagan revivir. Todos queren contarnos as súas historias, que as fagamos nosas. Os compoñentes do Club de Lectura contannos como debe ser unha desas veladas e as conversas entre eles:

2012-01-16T21:53:00.003+01:00

O SEÑOR IBRAHIM E AS FLORES DO CORÁN

Momo é un adolescente xudeu, desorientado e orfo de agarimo. Ibrahim é un tendeiro musulmán, de carácter reflexivo e pausado, cunha visión da vida marcada pola perspectiva e a experiencia dos anos. Dous habitantes solitarios da rúa Azul, no París dos anos 60, que traban unha entrañable amizade que trascende as súas respectivas crenzas. Un aporta vitalidade, o outro sabedoría...
Máis que unha novela, trátase dun texto iniciático que apela ao multiculturalismo, a tolerancia e o entendemento entre iguais. A súa lectura reconforta e afortala a nosa confianza na especie humana. Partindo dunha relación pseudo-paternofilial entre os protagonistas, este relato sinxelo e áxil ábrenos a porta a unha reflexión esperanzadora sobre o futuro do mundo no que vivimos.

Se queres podes entrar na páxina oficial do autor e visionar a versión cinematográfica da novela.

2012-01-16T21:46:00.003+01:00

O RAIO VELOZ
Agustín Fernández Paz (Ilustracións de Andrés Meixide)
(N-869 / FER / rai)

Adrián, aos seus 26 anos, vivía só, sen ter a quen amar nin ser amado. Aínda seguía á busca dun emprego que lle permitira ser feliz facendo máis feliz á xente anónima coa que se cruzaba cada día. Enterouse dunha oferta de traballo nunha empresa de mensaxería, O Raio Veloz, e foi á entrevista. Así comezou a súa oportunidade de axudar á xente. Cando tiña encargas que facer cambiaba as cousas do xeito que el pensaba que a xente sería máis feliz.

E unha tarde recibiu el unha gardenia en agasallo, acompañada dunha tarxeta misteriosa que indicaba que o amor verdadeiro só se presenta unha vez na vida. E en días sucesivos leváronlle maís envíos sorprendentes: doce rosas cuns versos de Eluard, a poesía completa de Cunqueiro, un cd de jazz, unha caixa de bombóns, o dvd de “Días de radio” e finalmente un camelio noviño. Cada paquete traía unha tarxeta e entre todas compoñían un xeroglífico que...

Un dos escritores máis recoñecidos, máis valorados e máis traducidos a outros idiomas, Agustín Fernández Paz é mestre ademais de escritor. Gran parte do seu labor está adicado á defensa do noso idioma e ao seu ensino. Participou activamente, moitas veces como membro fundador, nos movementos de renovación pedagóxica en Galicia. Tamén é co-director da colección de literatura Merlín. Por suposto podes atopar outros títulos seus na biblioteca do insti. Tes máis información sobre Agustín aquí.

2011-11-22T21:44:00.001+01:00

EL CASTILLOAMBULANTE

No país de Ingary, onde as botas de sete leguas e as capas de invisibilidade existen de verdade, Sophie Hatter, convencida de que sendo a irmá maior non podería ter unha vida feliz, atraeu a desagradable atención da Bruxa do Páramo, quen a enfeitiza cun maleficio que a converte nunha anciá. Disposta a facer o que cre adecuado, Sophie viaxa ao único lugar no que cre que poderá atopar axuda, o castelo ambulante que merodea polos outeiros próximos. Pero o castelo pertence ao temible Meigo Howl, que se alimenta, segundo din, dos corazóns de mozas desprevidas.

O cambio de Sophie non é só físico, véndose maior que os outros, comenza tamén a sentirse máis segura e a afrontar as situacións complexas con maior confianza en si mesma, aínda quue os sentimentos que experimenta son os propios dunha adolescente.

Libro de fantasía desbordante, da autora inglesa Diana Winne Jones, que foi alumna dos escritores J.R.R.Tolkien (O señor dos aneis) e de C.S. Lewis (As crónicas der Narnia). É unha autora coñecido e recoñecida nos países de fala inglesa, especialmente por usar dun xeito pouco frecuente e darlle unha volta aos tradicionais contos de maxía e bruxería. A serie completa inclúe outros dous títulos: El Castillo en el aire e La casa de los mil pasillos. O que aquí nos ocupa foi levado ao cine, en formato de animación no ano 2004, polo director xaponés Hayao Miyazaki.

2011-05-17T17:02:00.015+02:00

DRAGAL

A herdanza do dragón
Elena Gallego Abad
Na fachada da igrexa de San Pedro, o dragón de pedra agarda a que chegue o tempo no que Dragal recobre a vida. Hadrián aínda non o sabe, pero el é o elixido para conseguir que se cumpra a profecía. Mais, quen pode imaxinar que o vello templo medieval agocha as claves para atopar a senda do último dragón galego? Un antigo medallón de metal en estado vivo, herdanza do seu pai, será a chave que lle abrirá a Hadrián as portas para cumprir co seu destino. Para atopar respostas, o mozo tamén deberá buscar nos libros prohibidos da vella biblioteca do seu bisavó e mergullarse nos segredos que agochan as augas da Poza da Moura. Só grazas á amizade de Mónica, compañeira de clase no instituto, e coa complicidade de don Xurxo, o cura da parroquia, Hadrián poderá percorrer a senda que os cabaleiros da Orde de Dragal deixaron aberta para el moitos séculos atrás.

Elena Gallego Abad debuta na narrativa galega cunha primeira novela, finalista do Premio Fundación Caixa Galicia de Literatura xuvenil 2009, coa que se inicia, ademais, unha futura triloxía baixo o título de “Dragal”, o dragón galego.

A autora naceu en Teruel en 1969 e criouse en Verín. Traballou en diferentes emisoras de radio e tamén en varios xornais. Na actualidade traballa en Cangas de Morrazo. Acaba de publicar o segundo título desta triloxía Dragal, A metamorfose do dragón.

Aquí tedes algunha das ilustracións deste novo título. Se as queres ver pica aquí.

2011-04-09T18:37:00.014+02:00

EL IMPERTURBABLE HANS

Helent Grant

Lemos nesta ocasión unha deliciosa novela negra, cuxos protagonistas son nenos. O argumento sitúanos no pobo alemán de Bad Münstereifel. A súa protagonista é Pía, unha nena de 11 anos. Durante o Nadal a súa avoa explotou por mor dunha combustión (a laca do seu pelo explotou ao acender un misto). No colexio ninguén quere sentar con ela e a mestra séntaa con Stefan, coñecido como "o Apestoso". Stefan e Pía pronto se fan inseparables. Visitan ao señor Schiller, un home maior que lles conta historias de medo relacionadas co pobo e os seus habitantes...

Cando Katharina Linden desaparece, Pía e Stefan comezarán unha invetigación co fin de pescudar a súa desaparición. A desaparición doutras nenas, tamén en estrañas circunstancias, non fará máis que incrementar o misterio e as faladurías do pobo, convencido de que hai un asasino entre os veciños. Estes improvisados detectives descubrirán un misterio longamente silenciado.

É a primeira novela de Helen Grant, unha escritora alemana. Cunha prosa divertida, Grant constrúe unha fábula sobre o odio ao outro, que ten moito de lenda popular. A novela tamén reflexiona sobre a adolescencia e a incomprensión do mundo adulto (tanto Pia como Stefan perderon o apoio da súa familia, a primeira porque os seus pais están a piques de divorciarse, e o mozo porque en realidade nunca lle fixeron demasiado caso na casa), un mundo que non lles entende e que lles parece un lugar horrible. Os pequenos protagonistas ven na resolución do misterio o único xeito de lograr o recoñecemento que tanto anhelan.

Helen Grant (Londres, 1964). En 2001 mudouse coa súa familia a Bad Münstereifel (Alemaña), e inspirouse nas lendas que descubriu nesta cidade para escribir a súa primeira novela, O imperturbable Hans. Vive en Bruxelas co seu marido, os seus dous fillos e o seu gato.

2011-02-19T19:50:00.008+01:00

NOITE DE VORACES SOMBRAS
Agustín Fernández Paz
Sara, unha moza de dezaseis anos, narra os acontecementos que durante unhas vacacións de verán na casa da avoa foron un auténtico terremoto na súa vida. No cuarto que ocupa sentirá o inquedante desacougo dunha presenza fantasmal. Alí atopará, tamén, unha carpeta, cartas e fotos, unha libreta e unha variada biblioteca que a levarán a descubrir unha inesquecible historia de amor e desamor entre dous mestres republicanos, que se produciu durante a Guerra Civil e os amargos anos da posguerra.

Noite de voraces sombras, a nova novela de Agustín Fernández Paz, aborda un tema que hoxe está en primeiro plano: a recuperación das vidas e dos ideais que quedaron rotos trala Guerra Civil e a posguerra, así como a necesidade de que as novas xeracións coñezan esa realidade, porque non se poderá construír nada auténtico sobre a desmemoria.

Noite voraces sombras Guerra civil

View more presentations or Upload your own.

&amp;amp;amp;amp;amp;amp;amp;amp;amp;amp;amp;amp;amp;amp;amp;amp;lt;a href="http://www.mystudiyo.com/act136611/mini/go/noite_de_voraces_sombras"&amp;amp;amp;amp;amp;amp;amp;amp;amp;amp;amp;amp;amp;amp;amp;amp;gt;noite_de_voraces_sombras&amp;amp;amp;amp;amp;amp;amp;amp;amp;amp;amp;amp;amp;amp;amp;amp;lt;/a&amp;amp;amp;amp;amp;amp;amp;amp;amp;amp;amp;amp;amp;amp;amp;amp;gt;

2011-02-13T16:52:00.006+01:00

TRES SOMBREROS DE COPA
Miguel Mihura
Tres sombreros de copa é unha comedia de Miguel Mihura, escrita en 1932. Esta obra supón, pola súa orixinalidade, unha ruptura co teatro cómico anterior.
Mihura contrapón dous mundos enfrontados e irreconciliables: o burgués, hipócrita, ríxido e limitado por unha moral estrita, e outro máis libre e vital no que aínda é posible a imaxinación e a pureza de sentimentos.
Cando Mihura lla deu a coñecer a varios empresarios e actores en 1932, estes non a entenderon e a obra quedou sen estrearse durante 20 anos, ata que en 1952 o Teatro Español Universitario estreouna dirixida por Gustavo Pérez Puig no Teatro Español de Madrid. O público, composto en gran parte por xente nova e entendida, acolleuna con gran entusiasmo. Ao pouco tempo estreouse en réxime comercial, pero o público habitual dos teatros tampouco a entendeu, e retirouse de cartel despois de 48 representacións.
A partir desta experiencia, Mihura decidiu facer outro tipo de teatro máis alcanzable ao público do seu tempo. O propio autor dixo que esta obra chegoulle a caer "antipática", debido ás moitas dificultades para estreala.
A primeira edición desta obra imprimiuse en 1947. Desde entón, son numerosas as edicións e reedicións que se realizaron, sendo na actualidade unha das obras máis editadas e máis vendidas da historia do teatro español.

2011-01-16T12:48:00.007+01:00

EL ASESINATO DEL PROFESOR DE MATEMÁTICAS

Jordi Sierra i Fabra
Sierra i Fabra válese da estrutura da novela policiaca para contar a historia de tres amigos moi intelixentes que, con todo, son os únicos alumnos do seu grupo que non superaron esa temible materia dos números. O seu profesor non entende que sendo tan listos sexan incapaces de aprobar un exame que está moi por baixo das súas capacidades, así que decide darlles unha segunda oportunidade: esta vez non se tratará dunha proba convencional, senón dun xogo de detectives. Adela, Luc e Nico deberán facer de conta que ao seu profesor asasinárono; para achar a pista do asasino, terán que resolver problemas matemáticos. Só se resolven de forma correcta cada un deses problemas poderán develar o misterio.

Gústanche as matemáticas? Xa ves que poden ser un xogo se aprendes a velas dun xeito positivo. Asasinar á profe de mates non serve para nada. Poñen a outra no seu lugar e asunto amañado. E quen che di que vai ser mellor que a que tes agora? Ao autor deste libro, Jordi Sierra e Fabra, de neno tampouco se lle daban ben as matemáticas. Pero de maior descubriu que podían ser un xogo. Dinos que o libro está feito para que te rías e sufras un pouquiño co misterio e, ao mesmo tempo, intentar que mires de outro xeito as mates. Cando teñas que resolver un problema, trata de facelo a medida que o vaias lendo, este é o truco.

E cando acabes de lelo fálalle del á túa profe de matemáticas. Se ten sentido do humor, seguro que se rirá e, ao mellor, adopta os métodos do insólito profe desta novela.

Aquí tes algún enlace a páxinas de xogos matemáticos.

2011-01-02T20:33:00.012+01:00

EL CAMINO

Miguel Delibes

A terceira e unha das máis importante novelas de Delibes, El camino, foi publicada en 1950. Segundo el mesmo afirmaba, nela encontra a súa voz e estilo narrativos. Está considerada como unha das obras maestras da narrativa contemporánea.

Daniel, el Mochuelo, vai trasladarse á cidade para estudar o bacharelato. A noite anterior recorda os feitos que lle ocorreron na súa aldea, e descobre que o seu camiño está alí.

A novela é unha crítica, chea de ironía, do escurantismo, a ocultación, a rumoroloxía, o fanatismo e a hipocresía arraigados durante demasiados anos no medio rural. Un tema que Delibes tocaría con certa frecuencia posteriormente. Tamén nesta novela podemos observar unha crítica ao progreso que deshumaniza á persoa e degrada á natureza.

Delibes ten unhas excepcionais dotes de narrador e un gran creador de personaxes. Nas súas novelas relata a vida austera e mísera das xentes dos pobos de Castela, recollendo fielmente a súa forma de falar. Hai quen opina que para ler os libros de Delibes, debido ao léxico que emprega, nun futuro próximo necesitaremos facer uso do dicionario.

Un programa documental sobre o medio ambiente, El escarabajo verde, que leva por título Miguel Delibes, paisajes con palabras, fai un percorrido polos escenarios rurais de Castela que Miguel Delibes recolle nalgunha das súas novelas e fálanos do compromiso deste autor coa realidade do campo de Castela a mediados do século XX.

A partir desta novela faise unha película, en branco e negro, en 1963, dirixida por Ana Mariscal. Posteriormente, en 1977, unha serie de TV de 5 capítulos dirixida por Josefina Molina, que é un retrato da España rural e da paisaxe de Castela. Esta serie foi premiada no Festival de Praga en 1978. Moitos dos seus protagonistas son os habitantes de Molledo. Neste enlace ademais de poder ver esta serie, hai outros vídeos sobre o autor e a súa obra.

2010-11-28T21:11:00.005+01:00

A CABEZA DA MEDUSA

Marilar Aleixandre
Inspirándose no mito grego da medusa a escritora Marilar Aleixandre publica esta novela que foi premio da Fundación Caixa Galicia no ano 2008.
Nela cóntasenos a historia de Lupe e Sofía, dúas estudantes de 2º de Bacharelato que son violadas ao voltar dunha cea de entroido cos seus compañeiros de instituto. Ao igual que Medusa, as dúas rapazas descubrirán como moitos non se atreven a miralas de fronte e sufrirán debaténdose entre denunciar a agresión ante a xustiza ou renderse ante as presións do entorno, especialmente dos seus propios compañeiros. Ambas semellan ser para algúns as culpables pola súa indumentaria ou polo feito de subir nun coche cuns descoñecidos. Para outros está claro que son as vítimas.

A autora fai un acertado tratamento do mito da Medusa, no que, ao igual que en moitas sociedades actuais, castígase á muller agredida e non ao agresor.

MEDUSA. Medusa foi unha fermosa sacerdotisa do templo da deusa Atenea que entregara a ela a súa castidade, pero foi violada polo deus dos mares, Poseidón. Como castigo Atenea converteu os seus fermosos cabelos en serpes e fixo que calquera que mirase a súa cara quedase convertido en pedra. Se queres saber algo máis sobre este mito pica no enlace anterior.

2010-11-13T17:06:00.007+01:00

PODEROSA

Sergio Klein

Poderosa. Diario dunha rapaza que tiña o mundo na man.
Unha lectura divertida, refrescante, orixinal e fácil de ler.

Despois do grande éxito en Brasil, México e Arxentina, chega ao club Arao este título. Unha moza normal, chamada Joana, posúe o poder de cambiar o que ocorre ao seu redor. A partir de que se dá conta deste poder, Joana comeza a escribir cousas que se farán realidade sempre que escriba os seus desexos coa man esquerda.
O poder da escritura e da palabra pode ser suficiente para cambiar a historia e o presente. Así nolo conta o escritor brasileiro Sergio Klein: Todo o que escribe coa man esquerda convértese en realidade, e isto fai que Joana Dalva sexa unha persoa, moi especial...
No segundo título da serie, Poderosa 2, Sérgio Klein adéntrase no complexo mundo da adolescencia e embárcanos na aventura de descubrilo. Un novo diario protagonizado por Joana. Unha serie de libros para todos os lectores e lectoras que cren no poder transformador das palabras. Hai un terceiro volume Poderosa 3 que xa está publicado en Anaya en castelán. Podes lelo se picas no enlace.
O AUTOR. Sergio Klen comezou a súa carreira literaria como poeta, logo pasouse á narrativa converténdose no autor para rapaces máis destacado do Brasil. Faleceu o pasado mes de xullo en Bello Horizonte (Brasil), a mesma cidade onde nacera en 1963.

poderosa

View more presentations or Upload your own.

2010-05-26T21:55:00.003+02:00

ENTRAÑABLE XABIER

Algúns tivemos a sorte de tropezarnos, nos comenzos da nosa andaina profesional, con xente como Xabier Docampo. Logo resultou que o mundo lle recoñeceu o seu saber facer e a calidade literaria das súas obras. Xente coma el, como Agustín Fernández Paz, reabriron o mundo da literatura galega e foron quen de levar a literatura xuvenil feita aquí á categoría que hoxe se lle recoñece nos foros especializados de todo o mundo. Pero o mellor non é eso, o mellor é que Docampo segue a ser Xabier: lúcido, entrañable e amigo dos amigos.

Unha delicia ter outra vez na biblioteca a mestura de clubs de lectura, alumnos e adultos, e a Xabier falando para uns e para outros.

2010-05-24T18:55:00.004+02:00

A CASA DA LUZ
Xabier P. Docampo

A novela "A casa da luz" foi adaptada ao cine polo realizador Carlos Amil, sendo un dos primeiros films para nenos que se rodará en Galicia en acción real. A película, falada en galego, está protagonizada por actores locais, elixidos en castings feitos nos centros educativos de todas as comarcas de Galicia, entre rapaces de 8 a 13 anos, sen importar se contaban con experiencia no mundo audiovisual. Foron seleccionados como protagonistas seis rapaces: Agustina Bentos, Sheila Carbia, Jorge Taboada, Javier López, Claudia Peña y Antón Sampedro. O equipo de actores completouse cos actores galegos: Gustavo Pernas, Xosé Manuel Oliveira, Susana Dans, Antonio Mourelos, Cándido Pazó, Xulio Lago o Camilo Rodríguez. A película rodouse no verán para que os rapaces non perderan as clases. A rodaxe tivo lugar en Baio, Betanzos e Moeche.
Docampo, Premio Nacional de Literatura Infantil e Xuvenil, conta na novela, ilustrada por Xosé Cobas, amigo e colaborador habitual do autor, unha aventura centrada nun grupo de nenos, que ten como fío condutor a desaparición dun amigo nun mundo descoñecido e misterioso.
A casa da luz quere convidar aos nenos -e tamén aos que deixaron de selo- a unha viaxe na que descubran por medio da diversión, as emocións e a sorpresa, que cada día podemos volver a casa máis sabios se conseguimos superar o medo ao descoñecido, que a amizade é máis indestructible do que supoñiamos e que a solidariedade e a unión entre os pequenos permite vencer aos poderosos.

2010-05-01T16:31:00.005+02:00

ARAOS EN ROSA

Xa me tardaba ter un tempiño para colgar aquí a entrada sobre a visita de Rosa Aneiros ao noso Club de lectura. Penso que todos quedamos moi contentos da visita da autora, e ela tamén marchou moi contenta da reunión. Acababamos de sentarnos á mesa e xa parecía que fora ela membro do noso club desde a súa fundación.

Teño que reiterar aquí (por se o les, Rosa, un encanto) que todo foron facilidades á hora de organizar a visita, que case estaba máis preocupada ela que eu porque todo saíse ben.

Non todos os escritores teñen facilidade de palabra, nin están obrigados a tela, pero Rosa foi amena, simpática, cercana e moi clarificadora á hora de falar sobre o proceso de escritura de Resistencia e outras obras. Unha gran escritora que segue cos pes na terra e nunca olvida as súas orixes. Grazas Rosa, quedamos agardando as lagarteiras.

2010-04-07T18:19:00.007+02:00

CHAMANDO ÁS PORTAS DO CEO
Jordi Sierra i Fabra

Silvia, estudante de Medicina, marcha á India durante un verán para traballar como cooperante nun hospital dirixido por unha doctora española. Ao facelo, enfróntase cos seus pais e co seu noivo, e toma así unha decisión que cambiará a súa vida e a súa forma de pensar. Na India coñecerá a dor e o sufrimento dos que non teñen nada, pero tamén a alegría e a paz da súa conciencia, e vivirá a cabalo non de dous, senón de tres mundos: por unha banda Arturo, o seu noivo, que a espera en España; por outro Leo, cooperante coma ela, capaz de renunciar a todo por estar alí; e, finalmente, Mahendra, un hindú que garda o máis doloroso dos segredos e que a introducirá nun novo horizonte sen fronteiras.
O autor, Jordi Sierra i Fabra, naceu en Barcelona. Comeza a escribir con 8 anos e aos 12, escribiu a súa primeira novela longa, de 500 páxinas. Traballou como comentarista musical e director de revistas de rock. Ten unha extensa obra que (alcanza os 400 libros escritos) e obtivo multitude de premios. En 2006 e 2010 foi candidato ao premio Hans Christian Andersen, representando a España. Viaxeiro impenitente, a súa obra nútrese moitas veces das súas propias vivencias ao longo e ancho do mundo. En 2004 creou a Fundación Jordi Sierra i Fabra en Barcelona, destinada a promover a creación literaria entre os mozos de lingua española. Cada ano convoca un premio literario para menores de 18 anos. Pica no cartel de abaixo para ver algunhas curiosidades sobre a India:

2010-03-13T18:30:00.008+01:00

EL CAPITÁN ALATRISTE

Arturo Pérez-Reverte

El capitán Alatriste cóntanos a historia dun soldado veterano dos tercios de Flandes que malvive como espadachín no Madrid do século XVII. As súas perigosas aventuras serven para adentrarnos no coñecemento dunha época da historia, na que a decadencia do Imperio Español vén a coíncidir cun momento inigualable da cultura El siglo de Oro.

Diego Velázquez, Francisco de Quevedo, Lope de Vega, Ruíz de Alarcón... Todos estes personaxes coinciden no reinado de Felipe IV e aparecen na novela. Este é o primeiro título dunha saga que ten como protagonista ao capitán Alatriste. Os outros títulos son: Limpieza de sangre, El sol de Breda, El oro del Rey, El caballero del jubón amarillo e Corsarios de Levante. Foron publicados entre 1996 e 2006.

Os autores son Arturo Pérez-Reverte e a súa filla Carlota.

Pérez-Reverte naceu en Cartagena en 1951. Na actualidade dedícase exclusivamente á Literatura despois de ser reporteiro de guerra para o diario Pueblo e para TVE durante 21 anos. Escribe semanalmente unha páxina de opinión no suplemento XLSemanal que se dristribúe con 25 xornais españois.

Outros títulos da súa autoría son: El maestro de esgrima, La tabla de Flandes, La piel del tambor, La carta esférica, La reina del sur... Acaba de publicar a súa última novela: Asedio.

Arturo Pérez-Reverte ingresa na Real Academia Española o día 12 de xuño de 2003.

No ano 2006 fíxose unha película, Alatriste, dirixida por Agustín Díaz Yanes, na que segundo nos explica o propio Pérez-Reverte nun documental, trata de contarnos a vida do capitán (que non era capitán) ao longo dos seis títulos. Para poder ver este documental, en tres partes tedes que picaren parte 1, parte 2 e parte 3.

2010-02-04T16:40:00.008+01:00

LAS LÁGRIMAS DE SHIVA
César Mallorquí

A historia transcorre na cidade de Santander durante un verán alá polos anos 60, cando en España aínda había unha ditadura, pero en todo o mundo empezaba un tempo de cambios profundos: o movemento hippie, a loita polos dereitos da muller, as manifestacións contra a guerra do Vietnam, os Beatles, a chegada do home á lúa...

Debido á enfermidade de seu pai, Javier, o protagonista, ten que pasar todo o verán en Santander, en casa dos seus tíos e as súas catro curmás que viven nun antigo caserón cerca da praia do Sardinero. Non lle apetece nada esta viaxe. Cando chega alí nota que a familia Obregón é moi estraña e diferente da súa. No caserón onde viven parécelle ver en ocasións un espectro ao mesmo tempo que nota un peculiar cheiro a nardos; isto mesmo ocórrelle á súa prima Violeta. Violétalle fálalle da desaparición de Beatriz e do misterio das lágrimas de Shiva. Entre os dous tratan de descubrir o segredo. Ao principio lévanse moi mal, pero pouco a pouco vai mellorando a súa relación ata que ao final...

O seu autor, César Mallorquí conta así a súa vida: Nacín en Barcelona o 10 de xuño de 1953, pero o meu pai (José Mallorquí, o creador do Coyote) trasladouse a Madrid ao ano seguinte, e con el toda a familia. Cursei estudos de xornalismo na Facultade de Ciencias da Información da Universidade Complutense e desde 1970 traballei en diversas publicacións, entre elas a mítica revista O Paspallás. En 1981 cambiei o xornalismo pola publicidade e durante unha década traballei como creativo en diversas axencias. En 1991 regresei ao mundo da literatura (que abandonara durante a miña etapa de publicitario). Vivo en Madrid, estou casado e teño dous fillos. Deixei de fumar en 1986.

2009-12-25T17:44:00.011+01:00

A MANSIÓN DOS PAMPÍN
Miguelanxo Prado

Desta volta tocounos a lectura de cómics, un que lemos todos e outro da nosa escolla entre os nosos personaxes favoritos da historieta. O que lemos todos é este dun dos máis importantes autores de cómics que ademais é galego: Miguelanxo Prado. Se picas arriba no seu nome entrarás na súa páxina.

O señor Indalecio Pampín e a súa familia están moi felices. A súa tía Isolina deixoulles en herdanza unha casa de campo, rodeada de terreos e dun río. Pero cando el, a súa esposa e os seus fillos adolescentes chegan á mansión... descobren que o que pensaban que era un soño converteuse no peor dos seus pesadelos. Empeza así unha das aventuras máis divertidas do cómic español dos últimos anos...
Moitas veces acontécennos situacións absurdas que non por iso deixan de ser reais. Un cómic cheo de ironía e humor que non podes perder.

Este libro sobre as desfeitas urbanísticas no país, foi encargado polo Colexio Oficial de Arquitectos de Galicia a Miguelanxo Prado para a súa difusión nos institutos.

Aquí tes algunhas imaxes doutros personaxes de cómics coñecidos: Pepe Gotera e Otilio, Corto Maltés e Lucky Luke.

2009-11-15T19:31:00.005+01:00

A NOITE D'O RISÓN

Gonzalo Moure

Hai corenta anos, nun bar de pescadores, chamado O Risón, dunha vila da costa do Cantábrico na desembocadura do río Eo, nunha noite de treboada, coma non se lembra outra, un grupo de mariñeiros atrapados polo temporal e varios personaxes misteriosos, comezan a contar historias sobre tormentas, naufraxios e mortos. Xunto a eles, o protagonista, unha persoa allea ao mar que non pode regresar á súa casa por mor do temporal, pasará unha noite inesquecible, na que as súas lembranzas se mesturan cos relatos escoitados en boca dos mariñeiros.

Trátase dun libro moi imaxinativo no que o autor, Gonzalo Moure, cóntanos varias historias de medo non apropiadas para ler nas noites de treboada: un mariñeiro decide amputarse un dedo para fuxir das voces de ultratumba, outro naufraga nun barco aos pés dun faro enchendo de ratas a costa... Son historias nas que o autor consegue espertar a nosa imaxinación. Ides alucinar con elas!

Gonzalo Moure na súa páxina web cóntanos entre outras cousas: "Nací en Valencia, vivo en Asturias, me siento también saharaui, es decir: ciudadano del mundo. Al principio escribía en un ambiente propicio, pero prefiero viajar: ahora escribo, más y mejor, en aviones, trenes, cafeterías y salas de espera. Lo que escribo se llena, entonces, de la vida en ebullición que me rodea". Se queres visitar a súa páxina pica na súa fotografía.

2009-10-04T18:33:00.003+02:00

CONTA SALDADA
SUSO DE TORO
Este libro xuvenil, escrito por Suso de Toro, está protagonizado por unha adolescente chamada Catuxa, que descobre a causa da morte do seu pai. Catuxa vai ao despacho de seu pai e alí, a aparición da pantasma do pai, infórmaa de que fora asasinado e rompe coa versión oficial que falaba dun suicidio. O pai confésalle o que realmente pasara aquel fatídico día no despacho, un cliente seu, matárao. Así mesmo, cóntalle que ten un irmán (Xermán) ao que debe levar unha suma de diñeiro como herdanza.

Catuxa, influída pola asistencia a unha representación do Hamlet shakesperiano, decide vingar a morte do pai coa inestimable axuda do seu irmanastro Xermán.

2009-10-04T18:22:00.007+02:00

NUNCA SERÉ TU HÉROE
María Menéndez-Ponte
Nunca seré tu héroe é una novela realista sobre os conflitos adolescentes escrita de forma autobiográfica. Andrés é un adolescente que está farto do instituto, dos grans, da incomprensión de seus pais, da plasta da súa irmá, do “pijo” de Jorge, da vida en xeral e do profesor de historia en particular. A súa maior afección é debuxar cómics. A súa noiva Sara comeza a saír co mozo máis “pijo” da clase. A súa familia non está pasando por un bo momento, xa que o seu pai queda no paro. No libro trátanse unha serie de temas como: o amor, a amizade, as relacións familiares, a posibilidade dun embarazo non desexado, os grupos neo-nazis, os profesores do instituto…
Andrés demostrará á súa familia e aos seus amigos e amigas que é unha gran persoa. Tamén conseguirá un dos seus soños: gañar un concurso de cómics.
Esta novela pode axudarnos a que falemos de temas de interese na adolescencia. Nela aparecen moitas referencias culturais: Sherlock Holmes e Watson, a Celestina, Hitler, O capitán Trueno, o Cid Campeador…

Pica aquí e irás ata a páxina da autora.

2009-06-13T22:00:00.005+02:00

ARAOS ROSALIANOS
Os araos levantaron o voo para seguir a Ruta Rosaliana e visitar Bastabales, onde Sara leunos un anaco do famoso poema, logo a Casa Museo en Padrón e o por último o Museo do Pobo Galego.
Parece que dende o ano pasado a este aniñaron máis araos, pois, aínda que houbo un par de fallos de última hora, o número de araos en voo medrou bastante.
Déixovos aquí a información que repartimos na excursión e algunhas das fotos, miñas e de Olga, que fixemos.

Open publication - Free publishing - More biblioteca

2009-05-23T20:45:00.005+02:00

CORAZÓN DE TINTA
Cornelia Funke
Un libro que fala de libros. A historia dun encadernador/restaurador de libros (a quen máis adiante coñeceremos como "Lingua de bruxo") e a súa filla. Ambos son auténticos amantes dos libros, aínda que o pai, curiosamente, négase a lerlle en alto, cousa que facía antes e que ela sempre estraña.
Cando o perigo aparece, en forma dun malvado buscador de libros, escapan, buscando esconderse na casa de tía Elinor, outra amante dos libros que leva toda a súa vida adicada a eles.
Pero o perigo segue, e acabarán polos pobos das montañas da Liguria, onde Meggie, a protagonista, coñecerá os misterios que rodean ao seu pai e, tamén, as súas propias habilidades. Claro que todo isto non fai máis que aumentar o perigo no que se atopan...
Cornelia Funke traballou como ilustradora de libros e pronto comezou a escribir para un público novo. Ten escritos máis de corenta libros, traducidos a máis de trinta idiomas, e foi galardoada con numerosos premios internacionais
Algúns dos seus títulos foron levados ao cine, como "El señor de los ladrones" (tes o libro e a peli na biblio, naturalmente), ou a máis recente, "Corazón de tinta". Deste libro lévanse vendidos máis de 6 millóns de exemplares no mundo.
Comproba o que recordas pulsando aquí (se te atreves, claro!!)

2009-05-13T20:58:00.004+02:00

CINE PARA FALAR

Por fin poidemos celebrar a primeira xuntanza deste curso do programa da biblioteca cine para falar. Víñamola retrasando por diversos motivos ata hoxe, que vimos "Billy Elliot".

A experiencia foi moi boa. Da gusto ver a biblioteca con pais e fillos xuntos (ou incluso sen fillos)!! Vimos a película adultos e rapaces xuntos, para logo poder falar, aínda que os máis novos hoxe non falaron moito: os 'maiores' éramos 'maioría'! Seguro que nun par de sesións máis se soltan e opinan de todo, e a ver logo como nos entendemos uns e outros A min é o que máis me apetece.

Este curso xa será difícil volver a repetir a experiencia, porque xa se acerca o fin das clases, pero o próximo ano intentaremos facer unha cada trimestre. Estades todos invitados!

Intercambio cun inglés

2009-02-26T11:45:00.009+01:00

Intercambio cun inglés
Christine Nöstlinger

Ao chegar o verán, a nai de Ewald decide que un curso de verán en Inglaterra lle será de moita axuda coa materia de inglés que non se lle dá moi ben, igual que vos pasa a moitos de vós. Grazas á colaboración da súa irmá, Ewald consegue librarse da viaxe a cambio de recibir un rapaz inglés (Jasper) de intercambio. Pero a chegada de Jasper traerá moitas sorpresas.
A autora deste libro, Christine Nöstlinger, é unha das máis interesantes autoras xuvenís pola temática nada convencional dos seus libros e polo seu estilo literario que recrea a linguaxe coloquial xuvenil. A escola, a familia e as relacións entre os mozos son os seus temas favoritos, que sempre trata con sentido crítico e bastante humor.
Naceu en Viena, en 1936 e sempre viviu nesta cidade. Ten importantes premios, como o Premio Alemán ao Libro Xuvenil, o Premio Nacional Austriaco e o Premio Andersen, que recibiu en 1984, este premio está considerado como o máximo galardón internacional en literatura xuvenil.

Pica na imaxe do libro e poderás facer algunhas actividades, espero que divertidas.

2008-12-16T20:51:00.011+01:00

O NENO DO PIXAMA A RAIAS / EL NIÑO CON EL PIJAMA DE RAYAS
John Boyne
Aínda que o habitual é describir as características da obra que estamos a ler, por unha vez facremos unha excepción, porque estamos convencidos de que explicar o seu contido estropearía a experiencia da lectura. Cremos que é importante empezar esta novela sen saber de qué trata. Nembargantes, se decides embarcarte na aventura, debes saber que acompañarás a Bruno, un neno de nove anos, cando se muda coa súa familia a unha casa onda unha cerca. Hai milleiros de aramados coma ese en moitos sitios do mundo; só desexamos que nunca te atopes con ningún, e se o fas, que teñas forza para librarte del...
Esta novela do escritor irlandés John Boyne vén de converterse nun fenómeno mundial, e foi traducido a máis dunha vintena de idiomas e xa ten unha adaptación cinematográfica.Por último, cabe aclarar que este libro non é só para adultos; tamén o poden ler, e sería recomendable que o fixeran, rapaces e rapazas a partir dos doce ou trece anos de idade.
O editor
Este libro é unha forma de empezar a entender algunhas cousas terribles que sucederon en Europa no século XX, durante a II Guerra Mundial, e que seguro que a algúns vos sona de velas en películas. O malo é que desta volta as cousas pasaron de verdade, tal vez non exactamente como contan as pelis, pero igual de terrribles. Con este libro diante pódese falar de moitas cousas, averiguar outras da nosa historia recente e pararse a pensar como debemos facer para que algo así non se repita nunca máis.

Nenopixamaaraias

View SlideShare presentation or Upload your own.

2008-11-27T16:30:00.003+01:00

La brújula dorada

“La brújula dorada” é a primeira parte da Triloxía "A Materia escura". Esta fantástica aventura transcurre nun mundo paralelo ao noso, onde a tecnoloxía e a forma de vida evolucionaron de xeito diferente, aínda que, á vez, similar. Pero hai algo completamente estraño nese universo: as almas das persoas, ou as súas personalidades, maniféstanse como pequenos animais, os daimonions, que mentres son novos poden cambiar de forma. Tamén existen osos acorazados, grandes guerreiros do Norte, e bruxas, que sucan os ceos montadas nas súas "nube-pino". Este mundo está rexido polo todopoderoso Maxisterio, que pretende controlar as vidas, e os pensamentos, de todo o mundo… e de todos os mundos.
A novela narra a historia de Lyra Belacqua, que posúe unha brúxula dourada, o Aletiómetro, que aprende a interpretar e que lle indica sempre a verdade. Lyra acaba viaxando cara ao norte para salvar ao seu mellor amigo, ou eso cre ela... porque pronto descubrirá o seu verdadeiro destino.

Esta é unha historia de aventuras, pero, como a case todos os libros, podemos buscarlle 'algo máis'. Que opinas das intenciós do 'Maxisterio'? Como se nos presenta a Sra. Coultard e como é realmente? E que dicir da defensa da liberdade e da verdade que fai constantemente Lyra?... e tantas outras cousas!
Por certo que xa sabedes que se queredes rematar a historia, tedes os dous seguintes libros na biblioteca.

2008-06-17T22:23:00.004+02:00

Cando petan na porta pola noite

(Xabier P. Docampo)

Logo dunha reflexión inicial do autor sobre o gusto pola narración oral, que inclúe o recoñecemento a seu pai como gran contador de historias, reúnense catro historias de medo co desexo de que o lector sexa tamén dono do seu propio medo e as faga súas, para contalas tamén, a xeito de transmisor oral, continuando o fío da literatura tradicional popular.

As historias levan por título: O espello do viaxeiro, O fornadas, A loba e O cumpremortes.

Queríades un título 'de medo', pois xa o tendes! Agora a ver se algún non durme polas noites, que o Xabier, cando se pon, mete medo!!

2008-06-08T20:19:00.003+02:00

Araos en Santiago

Todos sabemos que os araos son aves de mar pero, de cando en vez, voan terra adentro e van de visita a lugares menos frecuentados por eles.

Este sábado os araos andivemos por Santiago facendo algunhas visitas. Non poidemos ir a bandada enteira porque algúns dos araos pequenos tiñan outra festa en Voz Natura. Tamén houbo máis de un que tiña pensado vir con nós e xusto ese día puxéronse malos... outra vez será! Os que andivemos por alí xa procuramos disfrutar por todos.

Os horarios non deron para todo o previsto, pero nos lugares que visitamos aproveitamos ben, e ademais conseguimos un 'enchufe' para outra visita futura o próximo curso, que din os araos estos que está ben eso de andar a voar por aí. Podedes ver as nosas andanzas nestas fotos.

2008-04-24T22:18:00.003+02:00

Unha de cine

Na reunión que celebramos hoxe os do club de lectura Arao-adultos non comentamos ningunha lectura; vimos a película "De amor y de sombra", baseada nun libro de Isabel Allende. Unha película que conta unha historia de amor que se desenvolve en medio dunha situación moi dura, en plena represión da dictadura chilena. Obviamente os comentarios posteriores fíxeronnos retroceder uns anos, non tantos, na historia do noso propio país. O que levamos andado en tan pouco tempo!
Menos mal que, como outras veces, o bon facer das asistentes "endulzounos" a sesión.

2008-03-31T22:27:00.004+02:00

La Historia Interminable

Michael Ende

El Reino de Fantasía está en un serio peligro: corre el riesgo de desaparecer. Pero los habitantes de éste no pueden hacer nada por evitar el mal que se cierne sobre ellos. Bueno, hay alguien que sí que podría ayudarles: Bastián. Un humano que se encuentra al otro lado de su mundo, en la realidad. A él recurren y éste, sin pensárselo mucho, se adentrará en una maravillosa aventura que cambiará para siempre su vida y la de sus nuevos compañeros de fatigas: Atreyu, un valiente guerrero con la piel verde, y un dragón de la suerte volador.

"La Historia Interminable", de Michael Ende, é posiblemente un deses pocos libros que sempre 'enchen' ao lector, independentemente da idade ou sexo. Deses que gustan por igual a rapaces e adultos, porque fai comprender o importante que é a imaxinación. Unha capacidade que moitas veces, incomprensiblemente, deixamos de cultivar a medida que nos facemos maiores, e que só uns poucos teñen a facultade de conservar.
Temos preparadas para ti unhas actividades se picas na foto do libro. Atrévete!!

2008-03-22T20:39:00.007+01:00

La suma de los días

Isabel Allende

Nas páxinas deste libro, Isabel Allende narra con franqueza a historia recente da súa vida e a da súa peculiar familia en California, nunha casa aberta, chea de xente e de personaxes literarios: fillas perdidas, netos e libros que nacen, éxitos e dores, unha viaxe ao mundo das adiccións e outros a lugares remotos do mundo en busca de inspiración, xunto a divorcios, encontros, amores, separacións, crisis de parella e reconciliacións.

Tamén é una historia de amor entre un home e unha muller maduros, que teñen salvado xuntos moitas dificultades sen perder nin a paixón nin o humor. Tamén é a historia dunha familia moderna, desgarrada polos conflictos e unida, pese a todo, polo cariño e a decisión de saír adiante.

Esta é a familia que descubrimos en Paula e que descende dos personaxes de La casa de los espíritus (da que se fixo unha adaptación cinematográfica). Unha obra ao tempo emotiva e escrita no tono irónico e apaixoado que caracteriza á autora, na que nos entrega a suma dos seus días como muller e como escritora.

Isabel Allende naceu en Lima (1942) Chile. Filla dun diplomático que lle inculcou a afección polas letras. Cursou estudios de periodismo. No 1962 casou con Miguel Frías, do que se divorciou no 1987, despois de ter dous fillos: Paula -vítima do cancro, morta no 1992- e Nicolás.

En 1973, logo do golpe militar chileno encabezado polo xeneral Pinochet, no que morreu o seu tío, o presidente Salvador Allende, abandonou o seu país e instalouse en Caracas, onde iniciou a súa producción literaria.

O CLUB DA CALCETA

2008-02-15T20:40:00.007+01:00

María Reimóndez

Seis mulleres moi diferentes entre si acoden a clases de calceta, un lugar onde converxen as súas frustracións pero, tamén, un lugar onde toman conciencia da súa situación e da necesidade de superala. Inspiradas na figura liberadora da tía Davinia, Matilde, Anxos, Rebeca, Elvira, Luz e Fernanda van facendo ás lectoras e lectores partícipes da súa historia, desde diversos puntos de vista, que van deixando ver os fíos dunha sociedade machista.

A través dun espazo tan tradicionalmente feminino como a calceta, María Reimóndez dálles voz a estas mulleres que, desde as súas diferenzas, atopan no valor da unidade a forza para sobrepoñerse a un presente que as nega e as minusvalora. Desde a intriga, cun estilo áxil, que tira do ánimo de quen le de xeito entretido e mesmo provocando a sonrisa, a autora do "Club da calceta" ofrécenos unha novela que, tras a sorpresa, provoca unha profunda reflexión sobre a condición feminina.

María Reimóndez naceu en Lugo e é tradutora e intéprete de profesión. O seu primeiro libro publicado foi "Moda Galega". É autora de varias obras de teatro e participou en distintos recitais poéticos. Unha das sús obras máis lidas é "Usha", de literatura infantil e xuvenil.

Ademáis de escribir María Reimóndez leva traballando en cooperación desde o ano 1994, cando realiza a súa primeira visita a un proxecto de desenvolvemento na India. Despois de novas visitas, funda a ONG IMPLICADAS/OS NO DESENVOLVEMENTO, que leva traballando na India desde o ano 1998 e desde 2003 en Etiopía, con proxectos de desenvolvemento integral e cun claro compromiso pola non discriminación das mulleres como base para un mellor futuro nos lugares nos que traballan. Podes ver as crónicas que envía desde Etiopía picando aquí.

2008-02-07T15:19:00.001+01:00

O Raio Veloz
Agustín Fernández Paz (Ilustracións de Andrés Meixide)
(N-869 / FER / rai)

2008-01-30T22:17:00.001+01:00

Nacen ARAOS a pares

Na nosa biblioteca nacen os Araos a pares. E iso que din que andan escasos e en perigo de extinción!

O caso é que, o 17 deste mes de xaniro, naceron dous clubs de lectura, un de alumnos e outro de adultos e, para colmo, nalgúns dos casos nais e fillos/as, cando coinciden os dous como mebros do club, leerán o mesmo libro para poder comentalo logo.

Na reunión/s de creación/s do/s club/s xuntámonos un lotiño. No recreo co alumnado, e acabamos sendo 11. Pola tarde na de adultos xuntámonos outro lotiño e máis as que non poideron asistir por causas maiores pero que forman parte do club.

Para empezar, ben, escollemos algo non moi longo e de calidade: para o alumnado "O raio Veloz" de Agustín Fernández Paz e o"O club da calceta" de María Reimóndez, para os adultos; non sei se influenciados polo feito de ter maioría aplastante de mulleres.

As cualidades culinarias tamén saliron a relucir, pois apareceu por alí unha tarta de queixo que foi vista e non vista. Na seguinte reunión, o día 21, prometeron que tamén habería sorpresa.

FELIZ NACEMENTO, ARAO