REBELDES (outsiders)

Susan E. Hinton

Ponyboy Curtis, de 14 anos, estuda secundaria e é bastante intelixente, sensible, que saca boas notas e ten intereses variados, incluída a lectura. O que parece non pegar tanto é que  pertence a unha pandilla dos chamados “greasers” (por usar ‘grease’-brillantina), de clase social baixa en contraposición aos “socs”, pandillas de rapaces de alta ‘sociedade’. Os ‘greasers’ viven moitas veces ao filo da lei, sobrevivindo como poden, con traballos mal pagados. Hai moita unión entre eles, e Ponyboy sempre pode contar cos seus hirmáns e con amigos como Two-bit.  Pola contra os ‘socs’ son xente con cartos que usan roupa boa e  conducen os coches cos que soñan os ‘greasers’, aínda que non todo é tan marabilloso como parece en principio.

Ponyboy vive cos seus hirmáns Sodapop e Darry, logo da morte dos pais. O maior, Darry, síntese responsable deles, especialmente de Ponyboy, aínda que este non entende moi ben o control do seu hirmán, que intenta que consiga unha vida mellor que a que ten el mesmo.

Sen querelo, Ponyboy e o seu amigo Johnny vense metidos nunha liorta cun grupo de Socs e un deles acaba morto. Ponyboy e Johnny acaban fuxindo...

Susan Eloise Hinton naceu en 1950 en Tulsa, Oklahoma. Escribiu profusamente na súa adolescencia ante a incapacidade de atopar libros que realmente lle gustasen nas bibliotecas da súa cidade natal. Con dezasete anos publicou a súa primeira novela, Outsiders (Rebeldes, 1967), que tivo un gran éxito de crítica e público e foi traducida rapidamente a varios idiomas, vendendo en total máis de nove millóns de exemplares nun só ano. O libro foi adaptado ao cinema por Francis Ford Coppola en 1983 e nel podemos ver de novos a algúns dos actores máis coñecidos hoxe.